Во СДСМ во тек е поднесувањето кандидатури за претседател
Во СДСМ во тек е постапката за кандидирање за нов претседател на партијата. Рокот истекува в четврток, на 6-ти јуни. Неколкумина веќе потврдија дека влегуваат во трката за наследник на Ковачевски. На СДСМ му треба лидер, а не шанса за стекнување капитал, што потоа ќе се користи за пазар за подобра позиција, вели Деспотовски за МТВ...
Течат роковите за избор на наследникот на Димитар Ковачевски. СДСМ до крајот на месецов ќе има нов претседател. Последниот рок за поднесување кандидатури истекува в четврток, на 6-ти јуни. Кандидатите треба да имаат најмалку 5 – годишно членство во СДСМ и најмалку еднаш да биле избрани од страна на конгресот за член на некој од органите на партијата. Освен лична и партиска биографија, кандидатите треба да достават и 4 – годишна програма за работа.
Досега, неколкумина објавија дека планираат да влезат во трката за прв човек на СДСМ. Кандидатурите веќе ги потврдија првиот човек на ТИРЗ, Јован Деспотовски и пратеничката и министерка за одбрана, Славјанка Петровска. На СДСМ му треба лидер, а не шанса за стекнување капитал, што потоа ќе се користи за пазар за подобра позиција, вели Деспотовски за МТВ. Според него, лидерот на СДСМ мора да биде одговорен кон членовите, а не кон различни структури и лоби групи.
Освен Деспотовски и Петровска, лидерски амбиции покажа и директорот на царината, Стефан Богоев, а се споменува и името на екс-министерот за здравство, Венко Филипче.
Ковачевски не планира повторно да се кандидира. Вонредните внатрепартиски избори во СДСМ ќе се одржат на 30-ти јуни.
Борис Грујоски