По осум круга гласање, сè уште не е избран претседател на Уставен суд
Осум неуспешни круга Уставен суд да избере нов претседател. По судијките Ана Павловска – Данева и Татјана Васиќ – Бозаџиева, ниту судијата Осман Кадриу не го доби потребното двотретинско мнозинство од шест гласа за да застане на чело на судот...
Пропадна уште еден обид уставните судии да изберат наследник на Кацарска. Откако судијката Ана Павловска-Данева се повлече од трката со образложение дека не сака нејзината кандидатура да биде причина за уставна криза, ниту нејзината противкандидатка – судијката Татјана Васиќ-Бозаџива не обезбеди две третини поддршка. Таа освои пет гласови, недоволно за да биде избрана за претседател на судот, а исто толку доби и судијата Осман Кадриу кому му недостигаше уште еден глас за да претседава со судот во наредните три години.
„Со оглед дека сè уште не е избран нов претседател на Судот, а со цел Уставниот суд да функционира непречено, судиите едногласно зазедоа став дека за прашањата кои се однесуваат на управувањето, да се одлучува колективно“, е наведено во соопштението од Уставен суд.
Мандатот на претседателката Добрила Кацарска истече на 2-ри јуни. Според Деловникот на судот, тајно гласање ќе има додека не се избере претседател. Во меѓувреме, судот непречено ќе работи бидејќи има пополнет капацитет, но ќе има ограничени ингеренции.
Анита Димитријевска – Велковска