Во струшко демне опасноста од нова епидемија на морбили

Демне опасноста од нова епидемија на морбили во струшко. Откако викендов беше откриен првиот потврден случај, шестгодишно момче од село Лабуништа, кое е хоспитализирано на Клиниката за детски болести во Скопје, ЦЈЗ засилено работи на откривање на контактите.

Откриени се пет невакцинирани деца во селото, но епидемиолозите велат немаат точен увид во списокот на имунизација, поради честите миграции на населението. Не се исклучува опасноста од проширување на болеста.

„Постои можност за проширување, како што реков тоа е заболување со висок ризик на контаминозност и тоа е специфично село каде што луѓето многу често патуваат и пет шест месеци се отсутни живеат во Италија, Германија па се враќаат назад немаме податоци дали се вакцинирани“, вели д-р Јованка Стурлакова Коровешоска епидемиолог од ЦЈЗ Охрид.

Препораките се да се засили епидемиолошки надзор и да се направат анализи од сите сомнителни случаи. Сите деца коишто требаше да се вакцинираат во јули предвреме се повикани, ќе бидат вакцинирани следната недела.

„Побарано е од сите матични, односно тие се само потсетени на нивната законска обврска дека секој сомнителен случај на мали сипаници со исип задолжително да биде пријавен во одделението за епидемиологија при ЦЈЗ Охрид, со цел да се земе крв од заболеното лице, да се потврди или да се отфрли заболувањето мали сипаници“, додава Стурлакова Коровешоска.

Вакцинацијата против мали сипаници се спроведува континуирано и задолжително со две дози на МРП вакцина. Во земјава опфатот со првата доза во 2023-та година изнесува 73,4%, а во Струга е 82,9%. Опфатот со ревакцинација на национално ниво изнесува 87,7%, а во Струга е 93,9%. На ниво на општина Струга, во 2019-та година беше прогласена епидемија на морбили.

Соња Рилковска