Зголемен бројот на колапси и сообраќајни незгоди

Десетина граѓани викендов колабирале на жешкиот асфалт, имало 16 сообраќајни несреќи, дел со жртви. Тимовите на Итната медицинска помош интервенирале и кај петмина граѓани со мозочни удари и кај десетина со покачен крвен притисок. На топлото време и високиот УВ-индекс најтешко им е на хронично болните.

Тимовите на итната медицинска помош за едно деноноќие имале 100-тина интервенции, од нив 30-тина биле од прв степен на итност. Се делат стотици совети дневно, а еден од нив да не се излегува кога е најтопло. Апел и до возачите на поголема внимателност – високата температура ја намалува концентрацијата.

„Колапсите во овој период се позачестени на јавите места, а викендов имаме и зголемен број сообраќајни несреќи, десетина, меѓу нив имаше и жртви. Топлото време го зголемува и бројот на јавувања и на интервенции кај пациентите со хронични заболувања, особено со хипертензија и мозочни удари, како и нивно пренесување до соодветна установа“, вели д-р Валентина Митреска од Итната медицинска помош.

Метеоролозите за оваа работна седмица прогнозираат многу топло време, на некои места температурата ќе го достигне и 40-тиот степен.

Лекарите секое лето го повторуваат апелот – да не се излегува кога е најжешко. Да се пијат повеќе течности, а хронично болните навреме да ја земаат потребната терапија.

Андријана Ѓурческа