Ноќен репортер: Прилеп нуди забава за сите стилови и вкусови

Преполни барови, кафулиња и локали. Забава и музика буквално за сите вкусови. Ова е ноќниот живот на Прилеп.

„Забавата во Прилеп е одлична, топ, прекрасно е“, велат прилепчани кои се забавуваа во ноќните локали.

Скоро во секој локал има бенд со жива музика. Од поп, рок па се до турбо фолк.
Иако е 15-тина минути после полноќ, забавата како сега да започнува, ноќниот живот не стивнува и тој продолжува до раните утрински часови.

За боемите има и музика со виолина на увце.

„Музиката тука во кафеаната е одлична, има добра забава“, рече еден прилепчанец.

Од ноќниот живот восхитени и странците. И гостите кои ги има од повеќе градови.

„Прилеп е прекрасен град каде можеш да ги видиш сите стилови на музика и да уживаш еве во еден ваква забава“, вели една туристка од Италија.

„Во секој бар имате жива музика, тоа е навистина прекрасно“, вели друга туристка од Романија.

„Во Прилеп се журката е одлична се забавуваме топ“, вели една гостинка од Скопје.

„Забавата можам да кажам дека е феноменална“, рече друга гостинка од Скопје.

„Добро е вака навечер, а особено за викенди луѓето да ја потрошат негатовната енергија преку дружење, муабетење, забавување и по некое ладно пивце“, истакна Марјан Ристески, градоначалник на Прилеп.

Но освен луѓе што се забавуваат има и такви и кои работат. Дел од нив се и пекарите.

„Воопшто не ми пречи да работам трета смена, веќе 10 години го работиме ова и се навикнавме“, рече еден пекар.

Има и такви иако е скоро два по полноќ сакаат да јадат топол леб.

„Си купив топол леб, и сега ќе вечерам со бијано сирење и пиперки, најубаво македонско јадење“, кажа еден прилепчанец.

Со еден збор, може да се каже дека Прилеп, можеби не е метропола, но пулсира во ритамот 24 часа дневно.

Дарко Штаргоски