Почнува едномесечна фудбалска еуфорија УЕФА ЕУРО 2024

Почнува едномесечна фудбалска еуфорија. Од денеска во Германија УЕФА ЕУРО 2024. Сите натпревари од шампионатот директно на јавниот сервис.

Вечерва со домаќинот Германија против Шкотска во рамки на групата А го отвара Европското фудбалско првенство. Италија е актуелен бранител на европскиот престол од 2021 година.

Турнирот го сочинуваат 24 репрезентации поделени во шест групи од по четири, кои ќе се борат за престижниот европски пехар. Ова 17-то издание на Европското првенство се очекува да биде и најквалитетно и највозбудливо за навивачите. Германија е фудбалска нација, која многу пати низ историјата била домаќин на големи турнири, па и овој пат се очекува организацијата да биде на најголемо ниво.

Според УЕФА, пристигнале дури 50 милиони барања за билети за натпреварите од турнирот, но на располагање за јавноста на продажба беа ставени 2,3 милиони билети.

На ова Европско првенство тешко се предвидува кој е најголем фаворит, бидејќи неколку репрезентации отскокнуваат со квалитетот.