Чесност и посветеност – критериуми за избор на министрите

Откако ги предложи мандатарот Мицкоски за министри, неговите сопартијци се огласија на социјалните мрежи со ветувања, најави и пред сè благодарност. Меѓу нив и четирите партиски потпретседатели кои ќе бидат идни министри.

Предложениот за вицепремиер и министер за транспорт, Александар Николоски вели дека со многу посветеност и напорна работа ќе ја оправдаат големата доверба од граѓаните. Според предлогот, доскорешниот технички министер за внатрешни работи, Панче Тошковски ќе продолжи да го води овој ресор, а со надворешните работи и надворешната трговија ќе раководи актуелниот градоначалник на Општина Аеродром, Тимчо Муцунски.

„Односите со нашите стратешки партнери да бидат уште позасилени, а Армијата да биде лицето на државата која ќе сведочи за нејзината организираност“ е пораката на Владо Мисајловски, кој ќе раководи со ресорот одбрана.

Весна Јаневска ќе ги води образовните политики, а мандатарот Мицкоски ја предложи и потпретседателката на ВМРО-ДПМНЕ, Гордана Кочоска-Димитриеска за министерка за финансии.

За информатичко општество и за дигитална трансформација досегашниот дополнителен заменик министер во овој ресор Стефан Андоновски. Министер за локална самоуправа ќе биде поранешниот директор на ЈП „Водовод и канализација“, Златко Пирински кој во изминатиот период го водеше и кабинетот на Мицкоски.

Сања Божиновска, актуелен член на ИК и експерт во енергетиката за министерка на новоформираното министерство за енергетика, рударство и минерални суровини, Цветан Трипуновски за земјоделство, шумарство и водостопанство, за култура и туризам актерот Зоран Љутков, а за спорт ракометарот Борко Ристовски.

Вицепремиерски места ќе добијат Љупчо Димовски од Социјалистичката партија и Иван Стоиљковиќ од Демократската партија на Србите, кои ќе бидат надлежни за политички систем – Димовски, и Стоиљковиќ за односи со заедниците. Шабан Салиу ќе биде министер без ресор задолжен за интеграција и имплементација на декадата на Ромите.

Мандатарот Мицкоски сепак потсети дека има голема надеж во предложените со кои ги чека многу работа уште од првиот ден.

Од коалицијата „Вреди“, предложен е Орхан Муртезани од Алтернатива за министер за европски прашања, Изет Меџити од Демократско движење за животна средина и прв вицепремиер.

За Министерството за социјална политика, демографија и млади, и за економија и труд, предложени се кадри од Беса-Фатмир Лимани и Бесар Дурмиши. Ресорот здравство ќе го раководи лидерот на Алијанса за Албанците, Арбен Таравари.

Игор Филков за министер за правда, Горан Минчев за администрација се предлозите на движењето ЗНАМ – За наша Македонија.

Составот на новата Влада ќе се гласа викендов. Ќе има четири министерства повеќе од претходно.

Фиљана Кока