Мандатарот Мицкоски со повик за обединување за историска трансформација на државата
Почна седницата за избор на новата влада. Мандатарот Мицкоски во образложението повика на обединување за историска трансформација на државата. Според собранискиот Деловник, предвидено е седницата да трае најмногу два дена, односно треба да заврши најдоцна до утре на полноќ…
Економско заживување, зголемување на пензиите и платите, инвестиции во образованието, здравството и културата, борба против корупцијата, одговорност за секој криминал и реформи усогласени со европските стандарди, најави мандатарот и премиер на новата влада Христијан Мицкоски на почетокот од седницата за избор на новата влада.
„Време е да ги засукаме ракавите и да ги решиме проблемите. Повикувам на единство и заедничка работа. За нова Македонија, за иднината на нашите деца, за подобар живот за сите нас. Време е да се исправиме, да го искористиме нашето знаење, нашата енергија и нашата желба за промена“, напиша Мицкоски на социјалните мрежи во пресрет на седницата.
На денешната собраниска седница, Мицкоски веќе за во вторник најави инвестиција од 400 милиони евра, а потоа и намалување на даноците и зголемување на пензиите.
„Нема да барам 100 дена меден месец, туку најавувам инвестиции веднаш, веќе во вторник инвестиција повеќе од 400 милиони евра, потоа намалување на даноците и зголемување на пензиите“, рече Мицкоски.
Собраниската седница ја следат претседателката Гордана Сиљановска-Давкова и претставници на дипломатскиот кор.
Владата ќе биде избрана ако за неа гласале мнозинството од вкупниот број на пратеници. Во новата влада ќе има вкупно 20 министерства, четири повеќе од досега, а ќе брои 24 члена.
Борис Грујоски известува од Собранието