Од 24 капитални инвестиции вредни 4 милијарди евра, завршен е само еден проект

Од 24 предвидени стратешки проекти во вредност од речиси 4 милијарди евра, државата завршила само еден. Ова е заклучокот од последниот извештај на Државниот завод за ревизија, кој се однесува на реализација на капиталните инвестиции финансирани од буџетот, фондовите на ЕУ, парите на општините. Ревидираните проекти се од периодот од 2021-ва до 2023-та година, а опфатени се и постари, вели за Македонската телевизија поранешната помошничка на државниот ревизор одговорна за ревизијата, Весна Младеновска.

Од ревидираните 24 проекти, договори за градба се склучени само за 19. Од нив за шест има застој, за два постои неизвесност поради изминат рок за градба бидејќи не се склучени нови анекси, а за четири се раскинати договорите. А од нив, за три веќе има и меѓународна арбитража и побарување за штета во вкупен износ од 45,5 милиони евра.

Меѓу ревидираните проекти се изградбата на патот Кичево-Охрид, трите фази од железницата, сите проекти финансирани од ИПА, особено од животна средина, за кои постои ризик од повлекување 100 милиони евра поради тоа што рокот за нивна реализација истекува догодина.

Од областа на здравството, неправилности и проблеми се констатирани во проектите изградба на Клиничкиот центар „Мајка Тереза“, регионалната болница во Штип и болницата во Кичево.

Марија Котовска