Иако берзата на труд бара техничари, слаб е интересот за техничките струки

Додека голем дел од гимназиите веќе ги пополнија квотите, некои од техничките средни училишта ги намалуваат поените за упис за да привлечат основците. Ваква е сликата во електротехничкото Михајло Пупин каде има едвај 80 запишани ученици.

Во второто пријавување од првиот уписен рок документи поднеле 18 полуматуранти, а  има слободни 400 места. Директорот Пејовски е изненаден од  малиот интерес за овие струки, затоа што овие кадри се најбарани на пазарот на труд.

„Веројатно е потребно време да се надмине она што на некој начин стана традиција кај нас- да се запишуваме во гимназија“, изјави директорот на средното техничко училиште „Михајло Пупин“, Ефтим Пејовски.

Голем дел од скопските гимназии ги пополнија квотите или скоро и да нема слободни места. Во „Ѓорѓи Димитров“ остануваат само 10 места за стручно образование, во гиманазијата „Корчагин“ 3, во „Јосип Броз Тито“ има 70 места, а во „Васил Антевски- Дрен“ нема да има втор уписен рок.

И покрај апелите основците да се запишат во некое од техничките училишта,  економското и гимназиите и годинава се најатрактивни за полуматурантите.

„Премногу ги исфорсираа децата да одат на општествените науки, а веќе многу од нив останаа и на берзата на трудот и тоа кандидати кои завршиле економски и правен факултет“, смета Александар Канурков, директор на средното училиште „Васил Антевски- Дрен“.  

Во второто пријавување од првиот уписен рок има слободни околу 22.400 места.

Резултатите од второто пријавување ќе бидат објавени на 3-ти јули, вториот уписен рок е закажан за 21-ви август. Училиштата кои нема да ги пополнат квотите ќе запишуваат  полуматуранти до 29-ти август.

Викторија Тодоровска