Пелагониските земјоделци разочарани од откупната цена на пченицата

Жетварското ехо и годинава тивко. Привременото задоволство од богатиот род или околу четири тони по хектар, и високиот квалитет на пченицата, потиснато од ценовниците на откупните пунктови.

Неколкуте битолски откупни пунктови со различни откупни политики. Некаде пченицата се откупува по 10 денари без разлика на квалитетот, а некаде таа изнесува од девет до 11 денари, во зависност од хектолитражата на пченицата.

Пелагониските земјоделци велат- ова е втора жетва по ред како добиваме откупна цена која е далеку од посакуваната 15 денари, а со која би биле на работ од рентабилноста.

„Уште полошо е, лани беше девет, годинава е десет. Каде е инфлацијата? Каде се трошоците нека кажат?“

„Секоја година влегуваме внатре, годинава пет денари, лани влеговме девет денари. И што ќе правиме ние, каде ќе одиме?“-велат земјоделците кои ги анкетиравме.

Откупувачите признаваат дека годинешнава реколта е со висок квалитет. Главната причина за актуелните бројки на ценовниците ја гледаат во драстичниот пад последниве неколку недели на светските берзи и големата понуда.

„Светските берзи имаа преголемо влијание, сите ги гледаме нив. Како е на берза, таква е и откупната цена. Моментално е 150 до 155 евра“, вели Александар Котевски сопственик на откупен пункт и мелничко преработувачки капацитет.

Во вакви услови поголемите земјоделци велат пченицата ќе ја чуваме. Но, сепак апелот е единствен да се гради соодветна стратегија за основната прехранбена суровина или и следниот есенски сеидбен план ќе биде потенок.

Стевче Митревски