Екстремно високи температури, пред нас е портокалова фаза
Македонија под вршник. Земјава влегува во портокалова фаза со температури над 40 степени, се очекува надлежните да ги активираат препораките за заштита на граѓаните…
На сонце неподносливо топло, но и под сенка едвај се дише. Во најтоплите часови, на отворено, скопјани излегуваат, само ако мораат. Се разладуваат под клима, а горештини како овие, велат, порано немало толку.
На најфреквентните локации се растрчаа и екипите на Црвениот крст. Им поделија вода на граѓаните, а им помагаа и на највозрасните безбедно да стигнат дома.
Лекарите порачуваат – останете хидрирани, носите светла облека, капа и очила.
Временската прогноза не оди во наша корист. Синоптичарите најавуваат температури над 40-тиот степен.
Поради влажноста во атмосферата, метеоролозите укажуваат дека температурите што ќе ги чувствуваме ќе бидат повисоки од оние што официјално се мерат под сенка.
Анита Димитријевска – Велковска