Финска усвои закон со кој се блокира влезот на мигранти од Русија

Финскиот Парламент усвои закон со кој граничната полиција има овластување да го блокира преминувањето на барателите на азил од Русија, откако повеќе од 1.300 лица пристигнаа во земјата, принудувајќи ја да ја затвори границата. Финска ја обвини соседна Русија дека ја користи миграцијата како оружје со тоа што охрабрува голем број мигранти од земји како Сирија и Сомалија да ја преминат границата, што Кремљ го негира.

Хелсинки смета дека Москва ја промовира миграцијата за да се одмазди за влезот на Финска во НАТО алијансата, која ја поддржува Украина против руската инвазија. Десничарската влада на премиерот Петери Орпо рече дека законот е клучен за запирање на идните пристигнувања на мигранти, и покрај тоа што законот е во спротивност со меѓународните обврски за човекови права.

Од март нема нови пристигнувања на баратели на азил. Финска ги затвори своите копнени граници со Русија на крајот на минатата година.

Финскиот предлог-закон беше усвоен со 167 гласови за, 31 против и еден воздржан. За усвојување на предлогот беше потребно двотретинско мнозинство гласови во парламентот од 200 членови.