СЗО: Стапката на вакцинацијата кај децата е под нивото пред пандемијата

Глобалните стапки на вакцинација кај децата останаа под нивоата пред пандемијата минатата година, соопштија Светската здравствена организација и УНИЦЕФ, што предизвика загриженост кај експертите. 84 проценти од децата на глобално ниво биле целосно вакцинирани против дифтерија, тетанус и пертусис или голема кашлица, тројна вакцинација која се смета за клучен показател за стапката на вакцинација на децата.

Бројката претставува мало намалување во споредба со нивоата пред пандемијата регистрирани во 2019 година, се вели во извештајот. Бројот на деца без ниту една доза од тривалентната вакцина се зголеми на 14,5 милиони минатата година.

Пред почетокот на пандемијата беше 12,8 милиони, се вели во извештајот. Според експертот на СЗО, Кетрин О’Брајан, во некои земји бројот на скептици за вакцините се зголеми како последица на пандемијата, што резултира со смрт на деца.