Синдикатите не се откажуваат од повисоки плати во здравството
Откако министерот Таравари ги олади здравствените работници дека годинава не треба да очекуваат повисоки плати, синдикатите тргнаа по состаноци. Очекуваат да се најде решение. Предупредија дека постои опасност, јавното здравство да остане без кадар. Матичните, пак, притискаат за покачување на капитацискиот бод.
Матичните лекари побарале пари, а надлежните време да најдат решение. Не добиле конкретен одговор кога ќе добијат повеќе, министерот на средбата им рекол 2025 година. Докторката Лилија Чолакова-Дервишова, очекува Фондот за здравство, Министерството за здравство да направат пресметки и да им го зголемат капитацискиот бод, за да не згасне примарното здравство. За повеќе од дваесет години добиле 30 денари покачување, а Фондот им ја исплаќа со три месеци задоцнување.
По изјавата на ресорниот министер дека нема пари за покачувања, синдикалците тргнаа да бараат решение. Синдикатот на Клиничкиот центар ги поддржува владините политики за капитални инвестиции во здравство, но велат и здравствените работници се капитал кој државата не смее да го изгуби.
Платите не се единствениот проблем во државното здравство. Фалат специјалисти од сите гранки, пациентите чекаат за базични прегледи преку „Мој термин“ со месеци. На сите пропусти во јавното здравство, ги удираат по џеб граѓаните, за сметка на приватното здравство.
Наташа Јанчиќ-Менковски