Таравари: Според критериуми ќе бидат вработувањата на специјализантите

Приватните специјализанти од последните три години на студии ќе имаат предност при вработувањето во здравствените установи. Критериум ќе биде видот на специјализација и просекот. Овие услови се договорени на средбата со министерот Таравари. Задоволни се од владината одлука за вработување на 600 вакви млади кадри донесена по низа протести, апели да им се регулира работниот однос да имаат повисоки просечни плати и здравствено осигурување.

„Следни чекори коишто ќе ги направи Министерството за здравство е регистар на приватните специјализанти, односно база каде што ние приватните специјализанти ќе се регистрираме со своите податоци, која специјализација сме, која година и според тоа ќе се прави вработувањето. Предност ќе имаат од повисоките години на специјализација. Односно четврта, петта и шеста, доколку не се исполнат 300 од тие години, ќе се вработуваат од трета втора и прва година“, изјави Кристина Илиоска Чешлароска – специјализант по интерна медицина.

300 специјализанти ќе бидат вработени годинава, преостанатите следната. Министерот за здравство Таравари очекува до крајот на годината да се реши статусот и на кадарот кој со години работи со договор на дело. За нив вели има пари и нема да се чека новиот буџет.

„Особено средномедицинскиот персонал кој подолг период работат и немаат решение за работа да најдеме и за нив решение. Нема да чекаме нов буџет, ќе се обидеме во склоп на овој буџет да го изменаџираме тоа“, изјави Арбен Таравари – министер за здравство.

Кон крајот на минатата година беше донесена одлука за вработување на 1.117 лица што работат со договор на дело во здравствените установи. Најавите беа дека бидат вработени пред изборите, седум месеци подоцна решенијата за овој кадар се во најава.

Андријана Ѓурческа