Стојковски: Постапките за езерото „Младост“ и хаваријата во Градско се во тек

Фекалии се влеваат во велешкото езеро „Младост“ и покрај тоа што функционира дел од колекторскиот систем – покажале анализите на Државниот инспекторат за животна средина . Загаденоста негативно влијае врз опстанокот на животинскиот свет во езерото и водата не е безбедна за капење и рекреирање. Микробиолошката загаденост е од петта категорија.

„Покрај тоа што функционира дел од колекторскиот систем истражувањето и анализите покажаа дека имаме фекално загадување, а тоа е од антропогеното влијание на човекот во овој дел. Водите од целиот колекторски систем потоа завршуваат во Вардар, значи не се третираат. Како што е и во нашата метропола каде што сите фекални води завршуваат во Вардар“, изјави Сретен Стојковски – директор на Државниот инспекторат за животна средина.

Парична казна од 120 илјади евра му се заканува на сопственикот на биогасната централа во Градско, откако викендов попушти дел од насипот и поголемо количество течно ѓубриво истече во реката Вардар. Во еколошката катастрофа, забележан голем помор на риби.

„Предвидена е санкција од 110 до 120 илјади евра во денарска против вредност, правното лице е среден трговец и шест илјади евра во денарска противвредност за одговорното лице“, изјави Сретен Стојковски – директор на државниот инспекторат за животна средина.

Директорот на Инспекторатот за животна средина го потенцираше и проблемот со недостиг од кадар . Во овој период инспекциски надзори вршат 15 инспектори за животна средина, три за природа и двајца водостопански инспектори. Проблем е старосната структура, имаат 14 инспектори над 55 години.

Андријана Ѓурческа