Трипуновски од Конче: Преку манифестацијата „Од зрно до погача“ ќе продолжи да се негува македонската традиција

Денеска во мултиетничко Конче, с. Лубница се одржа манифестацијата „Од зрно до погача“ на која се презентираа мултиетничките традиции, обичаи, здравата храна и соживотот на македонското и турското население кое што таму живее.

Во рамките на манифестацијата имаше и фолклорен дел посветен на жетварските обичаи од страна на локалните жители и беше изложена прекрасната традиционална храна од регионот.

Овој настан е поддржан од Министерството за земјоделство, шумарство и водостопанство во соработка со ЗРР Блесок од Радовиш.

На самиот настан присуствуваше и министерот за земјоделство, шумарство и водостопанство, Цветан Трипуновски, кој што посочи дека преку вакви манифестации може да се негува и зачува традицијата како наше најголемо богатство.

„Традицијата на еден народ е олицетворение на сето богатство што може да го презентира една земја. Преку повеќе вакви настани традицијата ќе продолжи да се раскажува преку храна, песни и игри“, истакна министерот Трипуновски.