Претседателот на Уставниот суд, Костадиновски упати честитка по повод Денот на Републиката 2 август Илинден

По повод одбележувањето на денот на Републиката 2 август Илинден, претседателот на Уставниот суд на Република Северна Македонија д-р Дарко Костадиновски во свое лично име и во име на Судот ја упатува следната честитка:

Денес, 121 година од Илинденското востание и 80 години од првото заседание на АСНОМ, со восхит за идеалите и почит за жртвите на нашите славни предци, живееме со нивниот завет. Обврзани сме да ја чуваме слободата и независноста на нашата Република. Обврзани сме да обезбедиме севкупен прогрес и просперитет за достоинствен живот.

Должни сме да бидеме лојални на Републиката, лојални на Уставот. Силата на Уставот лежи целосно во посветеноста на секој граѓанин да го штити истиот. Само доколку секој еден од нас ја чувствува таа должност, уставните права ќе бидат заштитени. Изградбата на правната држава денес е чин на врвен патриотизам и љубов кон сопствената татковина. Тоа е најсигурниот начин да го зачуваме заветот на нашите предци на кои денес понизно се поклонуваме.

Нека е честит и вековит Илинден, денот на Републиката!

Претседателот на Уставниот суд, д-р Костадиновски по повод големиот празник денеска положи цвеќе пред Меморијалниот центар АСНОМ во Пелинце.