Пораки по повод празникот Илинден испрати и претседателот на Собранието, Гаши

Со пораки за обединување, претседателот на Собранието, Африм Гаши го честиташе Денот на Републиката. Илинден е семето на визионерството за заедништво и тој ни припаѓа на сите-истакна – вели Гаши и додаде „Да се издигнеме над состојбите и да најдеме фактори на обединување наместо разединување. Пред домашниот и дипломатскиот кор тој порача да се фокусираме на реформи за подобрување на квалитетот на животот на сите граѓани. „Мојот избор е да гледам напред, да се исправиме каде се погрешило, да трасираме нови патишта за биде многу подобро од како до сега“ – истакна Гаши.

„Ќе работиме на носење на закони кои ќе ја заживеат економијата и ќе донесат странски инвестиции во сите градови подеднакво во северна Македонија и ќе го поттикнат претприемаштвото и иновациите кај нашите млади. Кога зборуваме за младите, особен акцент ќе се стави на законите во сферата на образованието, зошто токму квалитетното образование е клучот за долгорочен развој, напредок и светска конкурентност на една држава“, изјави Гаши.

Патриотизмот е влог во државата преку чесна работа и добри одлуки оценува првиот човек на законодавниот дом. „Уште од првиот ден на независноста државата е определена кон евроатлантскиот пат. Членството во НАТО е резултат на таа определба. За членството во ЕУ убеден сум дека ќе изнајдеме решение-вели Гаши.

„Нашето членство во Европската Унија не е само политичка цел, тоа е посветеност на збир вредности и принципи кои ќе ја унапредат нашата држава. Патот до членство во ЕУ е пат кон економски просперитет, социјален напредок и посилна демократија“, изјави Гаши.

Пред споменикот на претседателот на Крушевската Република Никола Карев пред Собранието, бројни државни делегации положија цвеќе, по што следуваше настапот на академскиот хор Мирче Ацев и на Националната установа на албанскиот ансамбл на народни ора и песни.

Марина Стојанова - Тонева