Онколошките пациенти од клиника на клиника, се чека за дијагностика, се чека и за резултати

Клиника за онкологија, па за Радиологија и обратно и така седум години скопјанката Лидија Стефановска го оди патот, како и сите онколошки пациенти. Неизвесноста по секој преглед станува сè поголема, ќе се најде ли термин за дијагностика, раширена ли е болеста и на другите органи. Лидија ја сретнавме пред Клиниката за радиологија, ги земаше резултатите од магнетната резонанца, вели ги прочитале за седум дена, но со месеци чека за скен на коски и за ехо на дојки ја упатуваат во Вевчани.

И други пациенти кои со месеци чекаат за резултати, сакаат да разговараат со министерот. Од Радиолошки институт одговорија дека се организирале работат и после работно време и за време на викенди, за да го намалат бројот на заостанати, непрочитани наоди, но и бројот на тековни наоди.

Со извештајот од Радиологија, Лидија се упати на Онкологија. Ни раскажа како со месеци немало терапија, и болеста се проширила од дојка, на коски, па на мозок. Терапиите коишто ги има на онкологија не ја лекуваат повеќе. И рекле сама да си ја купува терапијата, која чини 1.500 евра, и се прима на 21 ден.

„Не не се откажувам го сакам животот и затоа се борам“, изјави Лидија.

И на Онкологија велат дека се борат, во моментот има биолошка терапија, дневната болница работи во две смени. Се бара решение да се добие и нова терапија.

И додека да се крои и прекројува здравствениот буџет, останува неизвесноста за Лидија и пациентите како неа, на кои животот им зависи од донации, од хуманоста на граѓаните.

Наташа Јанчиќ- Менковски