Скопје поевтин од Тирана и Белград, поскап од Приштина

Онлајн базата на податоци „Нумбео“ во својот индекс на трошоците на животот, што го објавува на секои шест месеци, откри дека швајцарскиот град Женева има највисок резултат на вкупните трошоци на живот за првата половина од оваа година.

Цирих е на второто место, додека Њујорк е на третото. На листата која вклучува 218 градови, Скопје се наоѓа на 160 место според трошоците за живот.

Во споредба со земјите од регионот, поевтин е животот во Приштина, Косово (195 место) и Ниш, Србија (165). Трошоците на живот се повисоки во земјите-членки на ЕУ кои се во наша близина. Така, Атина е на 91 место на листата на најскапи градови, Љубљана 96 и Загреб 107. Зад нив е Тирана, град кој се најде на 114 место на листата. Понатаму е Белград на 127 место, Софија 132, Подгорица 143, Анкара 145, Сараево 148.

Компанијата со база на податоци ги разгледа факторите како што се цената на намирниците, оброците во рестораните, трошоците за изнајмување и колку далеку оди локалната валута за да ги формулира своите резултати.