Шести ден битка со огнената стихија на Галичица
Активни пожари во охридско струшкиот регион. Гори на Галичица, пожарот кој пред шест дена избувна од албанска страна се заканува да се прошири кон Преспа. Таму делуваат и пожарникари и воздухоплови. Пожари има и во струшкиот регион...
Шест денови трае битката со огнената стихија на Галичица. Екипите на противпожарната единица и ренџерите деноноќно на терен. Се дејствува и од копно и од воздух со ер-трактори и хеликоптери. Но, пожарот е сè уште активен од албанска страна, а состојбата дополнително се комплицира поради високите температури и силните ветрови, постои опасност од негово проширување кон преспанскиот дел, кон Стење.
„Имаме нов момент од пред два три-часа, како пред три години, ќе ни се повтори после фронтот од два километри на крајно југозападна точка со Албанија, почна се качува на крајни граници од албанската страна и ќе ни префрли во Македонија на горната точка 8, што претставува многу опасен проблем само поради неповолниот ветер“, вели Ѓуро Јовчески, ренџер во НП Галичица.
Екипите постојано дежураат и интензивно се делува за да се локализира пожарот, но проблемот е што од албанска страна нема посериозна акција, интервенција има само од копно.
„Значи од западниот фронт од крајната северозападна точка до крајната југозападна точка, два километри е веќе ликвидирано пред неколку дена. Проблемот е сега, бидејќи албанскиот дел не се гасеше префрла сега и навлегува од вчерашниот неповолен ветер‘, додава Јовчески.
Пожар од вчера има и во струшко, откако се запали депонијата во селото Октиси, а огнот се прошири и во селата Долна Белица и Велешта. Од противпожарната единица Струга велат, нема опасност по куќите во околните села, екипите работат на терен за локализирање на пожарот.
Соња Рилковска