Дождот ги изгаси тешките пожари кои со недели ја пустошеја земјава

Дождот, но и екипите на Центарот за управување со кризи помогнаа да се доизгаснат големите пожари кои беснееја подолго време, но тоа е само привремено, вели за МТВ Стојанче Ангелов. Според него, во моментов тешки пожари нема, активни се неколку помали со кои се справуваат надлежните.

Пожарите ја чинат државата многу пари и економските последици се огромни, велат од ЦУК. Колку за споредба, нови ер-трактори се поевтини од штетата која ја предизвикаа пожарите. Според Ангелов, потребна е итна трансформација на целиот систем за управување со кризи вклучително и на системот за гаснење на пожари како составен дел на ЦУК.

Земјава речиси два месеца се бореше го пожарите на отворено, дел од нив гореа со недели, а мораше да биде повикана и странска помош.

Претходно, ЦУК објави дека дождот го изгаснал големиот пожар на Галичица, кој гореше повеќе од две недели.

Но, не е сè така добро. Синоќа изгоре куќа во Старо Нагоричане, велат од Регионалниот центар за управување со кризи. На терен излегле 4-ца пожарникари со две возила и интервенирале до еден часот по полноќ кога огнот бил целосно изгаснат. Според надлежните, причината е спој на електричната инсталација.

Инаку, Владата веќе донесе одлука за реформа на системот за управување со кризи преку спојување на Дирекцијата за заштита и спасување и ЦУК што ќе придонесе кон поефикасен кризен менаџмент во иднина.

Борис Грујоски