Една паралелка првачиња помалку од лани во Охрид
Се намалува бројот на ученици и во Охрид. Годинава за прв пат во училишна клупа ќе седнат 435 првачиња, што е 25 помалку од лани, цела паралелка помалку. Советот на општина Охрид даде согласност за формирање на паралелки со помал број ученици од законскиот минимум...
Продолжува трендот на намалување на бројот на ученици во Охрид. Годинава во охридските училишта на првиот училиштен час ќе седнат 435 првачиња, а лани биле 460. Што е цела една паралелка помалку. Причините за намалувањето се во трендот на иселување и намалениот наталитет.
Советот на општина Охрид даде согласност за формирање на паралелки со помал број ученици од законскиот минимум.
„Драстично помал број од она што претходно сме биле навикнати. Кога станува збор за бројот на уписот на првачиња конкретно на седницата на Совет, ние ќе мора да дадеме согласност за формирање на паралелки кои што се под законскиот минимум. Под 24 во основните, под 34 во средните училишта. Пред две години беа 550 првачиња, лани беа 460“, рече Перчо Божиноски, претседател на Советот на општина Охрид.
Последните години расте интересот за стручно, а опаѓа за гимназиско образование. Најголем интерес има за електротехничките и машинските струки, особено за информатичките и телекомуникациските профили. Концептот за дуално образование и потребата од работна сила во фабриките во регионот се главните причини за оваа состојба.
„Со концептот на дуалното образование кај учениците предизвика интерес, но и отворањето на фабриките како Костал, ОДВ, Магна, побара таква работна сила особено знаејќи дека целта на дуалното образование е произведување на онаа работна сила онаа струка која е потребна на пазарот на трудот. Исто и во средното угостителско и економско училиште, така што тој тренд овие години е значителен“, вели Божиноски.
Новиот концепт на едносменска настава во Охрид од утре стартува во охридската гимназија и во шест основни училишта.
Соња Рилковска