Отписот на долгови го мина првиот собранискиот филтер

Елизабета Гацова од Штип веќе пет години живее без струја. Нема пари за да го плати долгот. Невработени се и таа и сопругот. Го чекаат отписот  за да им падне едно големо бреме од плеќите.

„Ќе го запазиме рокот, ќе поднесеме барање за отпис на долговите, ова е голема придобивка за луѓето кои не можат да си ги платат долговите“, изјави Елизабета Гацова, социјален случај.

Добра вест за Гацови е што Законот за еднократен отпис на долговите веќе го мина првиот собранискиот филтер. Следува амандманската расправа, по што на корисниците на социјална и постојана парична помош, на невработените кои повеќе од една година активно бараат работа, и на луѓето изложени на социјален ризик поради смрт на брачниот другар, инвалидност или потешка болест, ќе им се простат долговите за струја, парно, РДТ, но и минусите на кредитните картички, трансакциските сметки, потрошувачките кредити.

„ЕВН, банките, МРТ, Топлификација ќе склучат договор со Министерството за финансии, и за износот на долгот што тие ќе им го отпишат на овие категории граѓани ќе им биде одобрен даночен кредит, односно данокот на добивка што треба да го платат во 2015-та година ќе биде намален за износот на долгот што тие ќе им го отпишат на граѓаните. Мерката се носи еднократно и немаме намера да ја повторуваме“, изјави Зоран Ставрески, вицепремиер и министер за финансии.

Од ДОМ побараа отписот да важи и за луѓето кои загубиле дете.

„Оваа лична загуба е иста како и загубата на сопружник, а исти се и економските загуби при такви драми и трагедии“, изјави Лилјана Поповска, ДОМ.

Барањата за отпис ќе се доставуваат до центрите за социјална работа. Се проценува дека ќе бидат опфатени од 50 до 100 илјади луѓе.

Мартин Пушевски