За 300 работни места се пријавиле повеќе од 500 приватни специјализанти
За 300 работни места во јавното здравство се пријавиле повеќе од 500 кандидати. Сега се прават анализи кои профили аплицирале и на кои места можат да бидат вклучени во државното здравство. Дел од оние кои доаѓаат од внатрешноста ќе добијат понуда да се вратат во своето населено место и таму да ги лекуваат пациентите…
Речиси двојно пријавени од понудените работни места во јавното здравство. Приватните специјализанти покажаа интерес за вработување. На потег е министерството.
503 апликации од приватните специјализанти стигнаа до Министерството за здравство. Заинтересирани се за вработување на огласот којшто го отвори ресорното министерство. Во моментот се прават анализи каков кадар е потребен во јавните здравствени установи, но и каков профил се специјализантите кои аплицираа на овој оглас.
Освен личните податоци, универзитетот на кој се врши специјализацијата, просекот, имало и прашање дали се заинтересирани да се вработат според местото на живеење.
„Мислам дека имаа поделени мислења, но сепак генералното мислење на колегите е дека сакаат да го решат својот статус и да се вработат. Сега, кој ќе прифати и каде ќе биде понудено, тоа не можам да кажам“, вели д-р Христина Илиоска-Чешларовска, приватен специјализант.
Според најавата на надлежните, до крај на оваа година јавното здравство треба да се зајакне со млади лекари.
„Сигурно ќе се направи прелиминарна листа, бидејќи треба да се види колку од тие кандидати се шеста, петта или четврта година и како што беше претходно кажано, од тие три години ќе имаат предност да се вработат до Нова година“, изјави д-р Илиоска-Чешларовска.
Илисока-Чешларовска очекува сè да тече според ветувањето на надлежните, да се искористат согласностите за нови вработувања, а наредната година да се вработат и другите приватни специјализанти. Можноста за вработување на приватните специјализанти се отвори по бројните протести на младите лекари да им биде зголемен паричниот надоместок од 26.000 денари на 40.000 денари, но и да добијат здравствено и пензиско осигурување.
Наташа Јанчиќ-Менковски