М-НАВ: Отворена е истрага за избегнатиот инцидент на небото над Скопје
Македонска навигација отвори истрага за случувањата на македонското небо, по информацијата од порталот „Сакам да кажам“ дека за малку ќе се судриле два авиона. Случајот го проверува и Агенцијата за цивилно воздухопловство.
Авион на „Туркиш ерлајнс“ што летал од Мадрид до Истанбул и авион на „Санекспрес“, 30 секунди пред да се разминат биле на иста височина од 36.000 стапки, по што едниот се кренал за шест илјади стапки, а другиот се спушти, пренесе порталот „Сакам да кажам“. Македонска навигација отвори истрага за утврдување на фактичката состојба и причините за настанот.
„Ваквите настани како и секаде во Европа, секогаш се навремено пријавени и процесирани од сите релевантни одделенија, служби и институции, согласно постоечките правни процедури“, велат од М-НАВ.
Случајот го проверува и Агенцијата за цивилно воздухопловство, по поднесената пријава од М-НАВ. Според правилата на авиосообраќајот, меѓу авионите треба да има 2.000 стапки вертикална далечина, но, според информациите од Флајтрадар, тоа не било испочитувано во овој случај.
Игор Панов