Ограничени маржи наместо замрзнати цени
Постигнат договор за есенската потрошувачка кошница. Нема да се оди до замрзнати цени, туку со ограничени маржи и ќе важи еден месец...
Цените на храната нема да се ограничат, туку ќе им се ограничи профитната маржа до 10%, соопшти министерот за економија и труд Бесар Дурмиши. За почеток, станува збор за стотина основни прехранбени производи, а мерката ќе ги опфати лебот, пекарските и млечните производи, овошјето и зеленчукот.
Според министерот, постигнат бил договор за есенската потрошувачка кошница, и за неа ќе се разгледува на следната седница на Влада.
Паралелно, синдикатите велат дека државата мора да направи сериозни чекори за да им помогне на граѓаните, а прво што треба да направи е да ги зголеми платите на работниците.
Инаку, Законот за нефер трговски практики се очекува да стапи во сила кон крајот на месецот, што, според Владата, дополнително ќе придонесе за намалување на цените на производите.
Борис Грујоски