Пандов: Еден затвореник ја чини државата над 10.000 евра годишно

Еден осуденик државата ја чини повеќе од 10.000 евра годишно, а во земјава има 2.400 затвореници и уште толку чекаат да бидат ставени зад решетки. Бројката мора да се намали – вели директорот на Управата за извршување санкции. Има три начини – условен прекин на казните, електронски надзор и подобра ресоцијализација на осудениците зашто 60 проценти се повратници. Околу 400 затвореници користат отсуство и работен ангажман.

„Одреден дел од нив, над 100 излегуваат секојдневно до 7 или 8 часот наутро до 4 или 5 попладне во зависност како им е работниот договор. Ако тие така излегуваат зошто да не ги ослободиме тие луѓе, односно да имаат условен прекин на нивната казна“, изјави Александар Пандов – директор на Управата за извршување на санкции.

Судиите треба да се охрабрат почесто да изрекуваат условни отпусти со заштитен надзор – велат од правната фела.

„Веќе имаме и неколку отповикани условни отпусти осуди заради тоа што осудените не ги исполнувале обврските коишто им биле определени со заштитниот надзор, така и на тој начин ќе можеме уште повеќе да придонесеме да ја смениме сликата дека условно осудените останале неказнети“, изјави Биљана Коцевска – судијка.

Од Управата за извршување санкции најавуваат ново притворско одделение со капацитет за 400 лица, како и современ затворен дел за затвореници кои треба да одлежат над 10 години.

Андријана Ѓурческа