Божиновска: Владата прави напори да имаме мирна зима на енергетски план
Пред почетокот на зимата, надлежните прават пресметки колкави количества електрична енергија ќе ни фалат – РЕК Битола не е во добра кондиција, ниту хидрологијата не е поволна. Ќе се купува на подолг рок за да добиеме поприфатливи цени. Пари ќе се бараат од домашните банки, иако, на глава ни висат и наталожени долгови...
Новата Влада ќе вложи максимум да имаме мирна зима на енергетски план и непрекинато парно греење во главниот град, рече министерката за енергетика Сања Божиновска. Таа најави дека за оваа зима, струја ќе се набавува однапред за да се обезбедат пониски цени за домаќинствата. Потсети дека наследиле катастрофална состојба од претходната власт.
Божиновска изјави дека Владата ќе даде се од себе уште од стартот на следната година да нема зголемување на цената на струјата за граѓаните. Паралелно, рече дека одржливата и домашната енергија ќе бидат приоритет. Тоа вклучува изградба на енергетски објекти, електрани на гас, ветерници, како и модернизација на „РЕК Битола“, но и завршување на гасоводната мрежа.
Борис Грујоски