Водата во Гостивар небезбедна за пиење

По Струмица, каде повеќе од една недела има забрана за пиење на водата, анализите и во Гостивар покажале присуство на манган над дозволените граници. Но, во истиот ден биле направени две анализи, првата која покажала загаденост и втора од Центарот за јавно здравје – Гостивар, која покажале дека водата е безбедна за пиење, бидејќи вредностите на манган се во рамки на дозволеното, па затоа, нова анализа била побарана од Центарот за јавно здравје-Скопје. Градоначалникот најави одговорност доколку имало пропусти.

АХВ потврди дека забраната е од петокот, по што се направени нови анализи.

„Во саботата земени се четири мостри за бактериолошко и физичко-хемиско тестирање на водата од градскиот водовод, со акцент на присуство на манган, од различни локации и од страна на инспекциските служби на АХВ и Институтот за јавно здравје Скопје и од Центар за јавно здравје – Гостивар, чиишто резултати сè уште не се добиени“, велат од Агенцијата за храна и ветеринарство.

Проблем со водата има и во Тетово поради загаденост на водата во изворите Лешница, па градот се соочува со недостиг и ограничувања, а Струмица веќе втора недела е без питка вода.

Александра Спировска