Трајков ја заврши дводневната посета во Брисел, остварени бројни билатерални средби

За време на посетата пред европските бирократи, Трајков ги истакна забрзаните активности кои македонската влада ги презема за исполнување на условите за полноправно членство во ЕУ, но истовремено потенцираше дека како држава ќе продолжиме да ги браниме националните интереси.

Таа се заблагодари за поддршката на европските институции, но побара и поголема ангажираност на ЕУ, затоа што билатералниот спор со Бугарија не треба да биде причина за блокирање на преговорите за влез во ЕУ.

Трајков ја пренесе и загриженоста на македонските граѓани, кај кои расте евроскептицизмот, токму поради големите отстапки кои ги направи нашата држава во име на членството во Европската Унија и истакна дека час поскоро треба да се најде решение кое ќе го одблокира процесот за отпочнување преговори со ЕУ.

На средбата со Беатрис Гораванчи, новата директорка на канцеларијата на Фондацијата Конрад Аденауер во Брисел, Трајков се осврна на македонската европерспектива и предизвиците со кои се соочуваме, како и напредокот на државата во однос на Реформската агенда од Планот за раст.

Заменик министерката упати огромна благодарност за досегашната соработка со фондацијата која е на одлично ниво и е од особено значење за нас како земја.

Заменик министерка за европски прашања Викторија Трајков во Брисел оствари средба и со европратеникот Карло Реслер од Европската народна партија (ЕПП), кој истовремено е советник за политички и правни прашања на претседателот на хрватската Влада, а од неодамна е избран за копретседавач на Мешовитиот парламентарен комитет за соработка меѓу Македонија и Европската Унија.

На крајот од првиот работен ден во Брисел, Трајков се сретна со Дејвид Хадсон, експерт за политики за Западен Балкан и регионална стратегија во Европската Комисија, Андреј Феикс од Постојаната Мисија при ЕУ на Австрија во Брисел, Данијел Апостоловиќ, вонреден и ополномоштен амбасадор и шеф на мисија на Србија при ЕУ и Валентина Суперти, директорка на Директоратот за соседство и пристапни преговори со ЕУ.

Како нова Влада преземаме суштински мерки да ја приближиме државата кон европските стандарди и регулативи, затоа Македонија заслужува што поскоро да биде дел од европското семејство-ова го пренесе заменик министерката за европски прашања на средбата со Марион Валсман од Европската народна партија.

Трајков се заблагодари за големата поддршка што Валсман и ја дава на нашата држава и како член на Мешовитиот парламентарен комитет за соработка меѓу МК и ЕУ.

Дека подршката за Македонија во Брисел се зголемува и како земја добиваме силна поддршка за продолжување на реформскиот процес кон ЕУ, беше кажано по средбата на Трајков со Берта Лопез Доменеч од Центарот за европски политики задолжена за политиката на проширување и Западен Балкан.

„Се заблагодарив за континуираната поддршка и одличната соработка која ја имаме со европските институции и честитав за стартот на преговори на нашиот сосед Албанија со Европската Унија, но истовремено упатив жалење што Македонија повторно остана надвор од европскиот пат и не ги продолжува преговорите за членство во ЕУ“, кажа Трајков.

По средбата заменик министерката истакна дека ова ни дава дополнителен мотив да работиме забрзано и посветено.