ВМРО-ДПМНЕ: СДС и ДУИ го изложија државниот буџет на дополнителни трошоци и ја ставија на ризик довербата во институциите

Изминатите седум години владеење на СДС и ДУИ се обележани со низа скандали, економиски неуспеси и договарање на тендери во четири очи. Наместо креирање на политики за подобрување на економијата и раст на животниот стандард на граѓаните, секојдневно на виделина излегуваат низа компромитирачки и неуспешни политики на СДС и ДУИ, соопштуваат од владејачката ВМРО-ДПМНЕ.

Според извештајот на ДЗР за 2023 година, а кој се однесува за управување на јавните финансии и исплатите кои ги вршеле од Министерството за финансии управувано од СДС и ДУИ се утврдени многу нерегуларности.

По контрола на ОЛАФ, поради злоупотреба со ИПА средства, средствата кои Република Македонија ги вратила кон ЕК, власта на СДС и ДУИ не успеала да ги наплати од правното лице кај кое е утврдена злоупотребата.

Од партијата додаваат дека во извештајот се наведува дека се вратени над 600 илјади евра, тоа се пари кои се исплатени од буџетот на државата кон ЕК, затоа што државата има обврска да ги врати парите за кое ќе се утврди злоупотреба, а истата потоа тие средства ќе ги побарува од правното лице кое ја направило злоупотребата.

Парите кои се исплатени за злоупотребата кон ЕК, а СДС и ДУИ не успеале да ги наплатат од правното лице се доказ за неуспешноста и несериозноста на СДС и ДУИ  кон државните ресурси и европските средства.

Со самото тоа СДС и ДУИ и нанесоа сериозна финансиска штета на Македонија и буџетот. Штетите од владеењето на СДС и ДУИ се огромни, а јавноста допрва ќе има можност тоа да го види- соопштуваат од партијата..