Наставник физички нападнал дете во основно училиште во Скопје

Наставник по техничко образование натепал ученик за време на час во училиштето „Браќа Рамиз и Хамид“ во Шуто Оризари. Таткото на десетгодишното дете за МТВ вели дека по инцидентот, неговиот син веднаш му се јавил и му кажал дека наставникот му удрил шлаканици, нешто што го потврдиле и неговите соученици. Родителот го пријавил случајот и кај класниот раководител и кај директорот.

Директорот на основното училиште не сакаше да зборува пред камера, но не извести дека постапуваат во врска со настанот. И од МВР потврдија дека инцидентот е пријавен. Таткото поднел кривична пријава.

Таткото на детето разговарал со наставникот кој физички го нападнал детето, но тој негирал и кажал дека само го турнал. Тој стапил во контакт и со државниот просветен инспекторат, од каде добил одговор дека настанот не бил пријавен од страна на училиштето.

Таткото вели дека со кривичната пријава и цела медицинска документација ќе бара одговори од надлежните институции.

Александра Спировска