Охриѓани бараат пристап до Галичица

Охриѓани бараат безбеден пат за НП Галичица. Во време кога градот се гуши од загаден воздух и живописната природа им е недостапна.

Патниот правец Охрид Ресен преку Галичица во зима е затворен за сообраќај. Пристапен е само до месноста Корита, но и тоа е ризик, бидејќи е небезбеден. Нема банкини, сигнализација, заштитни мрежи, често има одрони и е широк само 5 метри.

„Најубавото нешто е Галичица, најчист воздух да се надишиш да прошеташ во недела, празник кога е, а зимата не можеме да одиме“.

„Тој пат има доста одрони треба државата да преземе ингеренции“.

„Многу е важно и многу е добро да биде отворен патот за да избегнеме загадување“.

„Срамота е странци доаѓаат и за нас охриѓани треба во секое време, да се изградат одморалишта станици да седнат туристите“.

„Убаво е да има проток, Галичица е прекрасна планина“.

„Треба да биде отворен да може народ со кола или пеш да види природа“, велат анкетирани граѓани.

Со затворањето на патниот правец кон Галичица се зголемува ризикот за оние кои не се откажуваат од планината. Најголем број од интервенциите на Планинската спасителна служба се врз заглавени возила и завеани лица токму во Националниот парк.

„За жал најчесто интервениравме на заглавени возила иако апелиравме луѓето да ги почитуваат забраните бидејќи за жал патниот правец ќе речам и ние би сакале да е отворен, но е затворен и секое непочитување на поставената сигнализација е прекршок и загрозување на сопствената безбедност“, вели Антонио Додески, од Планинска спасителна служба - Охрид.

Охридскиот регион е далеку од развој на планински туризам, многуте проекти останаа само на хартија. Пред повеќе од 40 години патот се одржувал, а Галичица била главен излетничко-рекреативен центар за локалното население.

Соња Рилковска