Аерозагадувањето руши рекорди, Скопје прв најзагаден град во Европа

Граѓаните се жалат од загадениот воздух, велат секојдневно ги чувствуваат последиците врз здравјето. И покрај алармирањето состојбата со години не се менува. Единствен начин да се заштитат е да не излегуваат од дома.

Секое 6-то до 7-мо предвремено новородено бебе е последица на загадениот воздух-велат докторите. Според нив аерозагадување е причина и за други болести.

До Народниот правобранител пристигнати се 20 претставки за загаден воздух. Иако Уставот гарантира право на здрава и чиста еколошка средина, состојбите и реалноста не одат во прилог на уставните заложби, истакна омбудсманот Зибери. Тој ги посочи причинителите за ваквата состојба.

Мораме да се соочиме со реалноста – или ќе плаќаме казни или тие пари ќе ги насочиме кон инвестиции и решавање на причините, а не да се бавиме со последиците. Гасификација на урбаните средини е едно од решенијата – посочи министерот за животна средина Изет Меџити.

СДСМ со став дека Владата не презема ништо против аерозагадувањето. Вицепремиерот не ја говори вистината, кога како решение нуди гасификација-велат од партијата. Обвинуваат дека во новиот Буџет преполовени се парите наменети за овој проект.

Марина Стојанова Тонева