Се кратат парите за превенција од болести, предупредуваат невладините
Континуирано се кратат парите за превенција од болести. Државата да обезбеди дополнителни средства и за лицата кои не се осигурани или се ранливи категории – апел од невладиниот сектор. Здравствените власти демантираат, велат дека ќе се прошируваат превентивните програми …
Трудниците, родилките, граѓаните без здравствено осигурување веќе две години немаат право на бесплатни прегледи – алармираат невладините организации. Решение на проблемот е побарано од здравствените власти. Дополнителен проблем-превентивните програми за малигни заболувања.
„Има жени кои на пократок или на подолг период остануваат без здравствено осигурување, а здравствените услуги за време на бременоста треба да се остварат во точно определен период, не треба одложување. За жал, и по две години Министерството за здравство не предвидува буџет и мерки за покривање на трошоците за бремени жени кои немаат здравствено осигурување“, изјави Борјан Павловски – здружение ЕСЕ.
„Можеме да ја унапредиме превенцијата, кога станува збор за скринингот на малигните заболувања на годишни ниво опфаќаме околу 25, а потребни се 115 илјади“, вели Елизабета Божиновска – директор на здружението „Хера“.
Парите за превенција се кратат – укажуваат невладините. Во програмата за ХИВ, во последните години буџетот е намален за 50 до 60 проценти. Здравствените власти демантираат.
„Доколку продолжи може да остави повеќе од осум илјади граѓани без услуги што за нив значат најосновна здравствена заштита, а тоа негативно би се одразило на ширењето на епидемијата и сигурни сме дека не значи штедење и дека ќе се врати како драстично поголеми трошоци за лекување, поголем број на инфицирани“, изјави Андреј Сених – директор на здружението „Заедно Посилни“.
„Нема тренд на намалување на програмите, напротив програмата што ја спомнуваат беше иста и лани и пред таа година. За оваа година сè уште не можам да кажам како ќе биде, зашто предлог-буџетот е во Собрание. Заедно со СЗО основна цел ни е да направиме ревизија на превентивните програми и да ги прошириме“, рече Јовица Андовски, заменик-министер за здравство.
И од Светската здравствена организација укажуваат дека превенцијата и заштитата од болести се клучни за секој здравствен систем.
Здравствените политики треба да одговорат на потребите на граѓаните – велат невладините организации. Очекуваат поддршка од парламентарните групи, бидејќи без законска регулатива нивните барања нема да можат да се реализираат.
Андријана Ѓурческа