„Ескапизам: Меморијата и идентитетот“ самостојна изложба на младата уметница Мила Добревска

Вечерва со почеток во 20 часот во Националната галерија објект „Мала Станица“, ќе се отвори самостојната изложба на младата мултидисциплинарна уметница Мила Добревска „Ескапизам: Меморијата и идентитетот“.

Мила Добревска (1999, Скопје), неодамна магистрираше на Академијата за ликовни уметности во Равена, Италија со специјализација во современ мозаик. Таа е активен член на Друштво на ликовни уметници на Македонија ДЛУМ и МАРТЕ Асоцијацијата за современ мозаик.

Досега младата македонска уметница имала бројни групни изложби и учество на натпревари на интернационално ниво, од кои ги издвојува презентациите на нејзините дела во Италија, Франција, Шпанија, Србија, Полска, Словенија и Македонија, а покрај тоа зад Добревска стојат три самостојни изложби од кои првата беше во МКЦ, Скопје во 2022 година, а во 2024 година ги реализираше изложбите во галеријата „Пионери Арт Платформ“ во Барселона и во „Св. Станислава институтот“ во Љубљана, Словенија.

Стефан Александар Јовановски истакнува дека самостојната изложба на Мила Добревска „Ескапизам: меморија и идентитет“ го истражува човековиот копнеж за ослободување преку живи, емоционално наполнети дела инспирирани од македонското наследство и модерната интроспекција. Во делата на Мила, Јовановски појаснува дека: „Ескапизмот станува мост меѓу минатото и сегашноста. Македонските традиции, како орото или сложените дезени на везовите, со генерации служеле како бегство, нудејќи радост, заедништво и отпорност во тешки времиња. На сличен начин, нејзините смели и контрастни композиции нè повикуваат да размислиме како денес создаваме моменти на занес – преку уметност, имагинација или саморефлексија. Делата на Мила одекнуваат со живописни бои и текстури, црпејќи инспирација од народниот вез и колективната енергија на македонската култура. Овие елементи се испреплетуваат за да ја прикажат двојноста на ескапизмот – мали паузи на задоволство или големи мечтаења полни со надеж. Делата не се само визуелно уживање, туку и покана за размислување: Дали ескапизмот е само бегство, или е и пат за рефлексија и лична трансформација? Како традициите, кои некогаш биле прибежиште, стануваат дел од нашиот модерен идентитет? Што значат обредите и уметноста во контекст на современите човечки „занеси“?“ – вели кураторот Јовановски. Изложбата на младата уметница Мила Добревска е поддржана од Министерството за култура на Република Северна Македонија и КомшиLOOK.

Изложбата „Ескапизам: Меморијата и идентитетот“ ќе биде отворена до 22-ри декември.