Таравари: Се анализира работата на директорите во јавното здравство, ќе има промени

Директорите на здравствените установи под лупа на Министерството за здравство. Дел од нив не ги дале очекуваните резултати и ќе бидат разрешени – најави министерот Таравари. Не откри кои менаџери имаат слаби оценки, но рече оти секојдневно добива информации дека во одредени болници, здравствени домови, клиника има незадоволство и од персоналот и од пациентите.

„Таму каде што не се раководи како што треба би требало да направиме промени, меѓутоа дајте ни време за да имаме основи и факти за некои од директорите дека, генерално, не функционирале добро“, изјави министерот за здравство, Арбен Таравари.

Невладини, пак, предупредуваат дека е потребно да се промени законот за директорот да нема дискреционото право да вработува кого сака, туку да мора да се води по ранг-листата и да ги избере најдобрите, а не како досега.

„Директорот да биде обврзан со ранг-листата изработена од комисијата. Ранг-листата да биде базирана на објективни критериуми и да спроведе објективен процес на проверка на кандидатот и директорот само да го потврди изборот на кандидатот, со можност за исклучок доколку постојат основани причини, но да образложи зошто не го поддржува кандидатот кој е избран од Комисијата“, изјави Гоце Коцевски од Македонско здружение на млади правници.

Во сите здравствени установи низ државата има недостиг од медицински сестри, болничари, лаборанти.

Андријана Ѓурческа