Мицковски: Македонија нуди одлични услови за бизнис

Мицковски во интервју за МИА посочува дека би сакал во Македонија да види повеќе компании од услужниот и финансискиот сектор, затоа што е битно за македонската економија да постои тој баланс меѓу производство и услуги. Очекува фокусот за привлекување инвестиции да биде насочен кон британскиот пазар и Југоисточна Азија.

„Македонија нуди одлични услови за бизнис во многу сектори. Од мојот краток период овде, впечаток е дека компаниите од производствениот сектор повеќе се присутни и тој тренд очекувам да продолжи. Би сакал да видам повеќе компании од услужниот и финансискиот сектор во Македонија затоа што мислам дека е битно за македонската економија да постои тој баланс меѓу производство и услуги“, вели Мицковски.

Посочува дека Македонија со одличниот даночен пакет, квалификуваната работна сила и ниските трошоци за бизнис создава одлични можности за инвестирање. - Дел од мојот фокус во овој мандат ќе биде насочен кон оваа цел, да се обидеме да донесеме повеќе инвестиции од услужниот и финансискиот сектор, истакнува тој.

Инвестицискиот тим, како што вели Мицковски,  има глобален фокус.

„Логично е секој од нас во оваа работа да го користи искуството и контактите стекнати претходно во одредени пазари. Затоа очекувам добар дел од фокусот да ми биде на британскиот пазар кој го познавам добро и кој има голем потенцијал и од кој очекувам повеќе инвестиции во овој мандат. Северниот дел на Европа, каде трошоците за бизнис се сеуште високи, исто така нуди одлични можности, а доста солиден потенцијал гледам и во Југоисточна Азија, каде исто така имам работено и чиј пазар го познавам добро“, истакнува министерот.

Тој, во интервјуто, меѓу другото посочува дека ќе се заложи за обезбедување повеќе инвестиции и нови работни места за доброто на граѓаните на Македонија.

Инвестицискиот тим на Владата работи одлично, вели Мицковски и додава дека чувствува личен предизвик да помогне со свое знаење и искуство целиот економски проект, кој е многу важен за Македонија да се реализира.