Тешка авионска несреќа во Јужна Кореја, двајца преживеани

Стравотна авионска несреќа во јужна Кореја. Боинг 737-800 на јужнокорејската нискобуџетна компанија „Џеџу-Ер“ кој пристигнувал од Бангког при слетувањето на аеродромот во Муан, се излизгал на пистата, удрил во бетонска ограда и се запалил. На видеоснимките се гледа дека пилотот не успеал да ја постави опремата за слетување. Од 181 патник и членови на екипажот, пронајдени се само двајца преживеани – маж и жена, тајландски државјани. Над илјада и 500 пожарникари, полицајци, војници беа вклучени операцијата за гаснење на пожарот и извлекување на телата.

„Првите претпоставки се дека несреќата е предизвикана поради лошите временски услови или поради влетување во јато птици, но точната причина ќе биде утврдена по дополнителните форензички истраги“, изјави Ли Џеонг – Хјеон, шеф на противпожарна станица во Муан.

Авионот бил произведен во 2009-та година. Компанијата, основана во 2005-та година, е нискобуџетна авиокомпанија со меѓународни летови до Јапонија, Тајланд и Филипините, како и неколку домашни дестинации. Извршниот директор на авиокомпанијата „Џеџу-Ер“ се поклони пред јавноста во знак на извинување за една од најкатастрофалните авионски несреќи во Јужна Кореја.

„Упатувам искрено извинување и сочувство до сите кои го загубија животот во несреќата и до нивните семејства. Во моментов е тешко да се претпостават причините за несреќата, потребно е да се почекаат резултатите од официјалната истрага на надлежните органи“, изјави Ким е Бае – извршен директор на „Џеџу-Ер“.

Трагедијата се смета за една од најтешките несреќи во авиосообраќајот што се случиле при слетување. Во јуни 2007 година во Сао Паоло загинаа 187 патници и членови на екипажот откако „Еербас А320“ се излизга од пистата и удри во зграда.

Маја Стојанова