Грипот забрзано ги полни амбулантите

Во првата недела од новата година над 330 граѓани заболеле од грип, речиси за 50 проценти повеќе од претходната. Највисока инциденца е забележана кај децата од 5 до 14 години. Од вкупниот број заболени половина се од Дебар. Ова се последните податоци од Институтот за јавно здравје кои покажуваат дека грипот почнува да ги полни амбулантите. Страдаат и возрасните и децата. Грипот дава сериозна клиничка слика со висока температура која трае со денови, кашлица, болки во грлото и телото. Доктор Мира Атанасова дневно прегледува и по 70-ина пациенти, вели најризични се децата, кај нив вирусот многу брзо прогресира.

„Температурата од нула до пет степени што ја очекуваме наредните денови е погодена за грипот. Тоа е вирус што ги сака тие временски услови. Апелирам на внимателно однесување, да нема големи контакти, да нема дружби доколку нема потреба. Важна е личната и колективната хигиена“, изјави д-р Мира Атанасова, педијатар.

Со полн капацитет работат и педијатриските болници. Пикот на грипот се очекува кон крајот на месецов или почетокот на февруари.

За подобар имунитет, доктор Атанасова советува да се земаат витамини.

„Вирусот е зависен од Д витаминот, во зима нема сонце, нема како да ни се создаде во кожата, затоа суплементацијата мора да биде и кај децата и кај возрасните. Советуваме повисоки дози на Ц витамин, цинк и селен – тоа се микроелементи кои имаат значителна функција во имунитетот кај нас“, изјави д-р Мира Атанасова, педијатар.

Иако бројот на заболени се зголемува, од Институтот за јавно здравје велат интензитетот на вирусот на грип е низок.

Дополнителен проблем во справувањето со вирусите и настинките на лекарите им создава и загадениот воздух. Тој е најголем причинител за респираторни заболувања, најмногу страдаат хронично болните.

Андријана Ѓурческа