Франција издаде налог за апсење на Башар ал Асад

Француското правосудство вчера издаде налог за апсење на соборениот сириски претседател Башар ал Асад под сомнение дека учествувал во воени злосторства, особено во врска со смртта на маж со француско-сириско потекло во 2017 година. Истражните судии го сомничат Асад за соучесништво во убиства и напади врз цивили.

Весникот Le Parisien објави дека 59-годишен маж бил убиен кога неговата куќа во јужниот сириски град Дара била бомбардирана од хеликоптери на сириската армија во јуни 2017 година. Повикувајќи се на истражители, весникот наведува дека француското правосудство се сомнева дека Асад го наредил нападот и ги обезбедил потребните средства за него. Во тоа време, владата на Асад се обидуваше да ја преземе контролата врз Дара од опозициските сили.