Струмичани се подготвуваат за протестен марш против загадениот воздух
Во Струмица се спрема протестен марш против загадениот воздух. Поддршка дава и градоначалникот кој тврди дека и покрај инспекциските надзори своеволието на одредени субјекти продолжува. Екоактивистите бараат и законски измени за поголеми ингеренции на инспекторите кои сега се потпираат на резултати од акредитирани лаборатории кои ги плакат самите фирми...
Градоначалникот на Струмица, Костадин Костадинов, ќе биде дел од протестниот марш во сабота заради загадениот воздух што го организираат екоактивистите. Ќе се приклучи оти струмичани заслужуваат да дишат почист воздух, но и фактот што одредени субјекти биле посилни и од законите.
„Субјектите кои имаат ингеренции за контрола се континуирано на терен, но определени субјекти се посилни и над законите. И покрај реализираните инспекциски надзори и опомени, своеволието на одредени субјекти продолжува! Не смееме да дозволиме граѓаните да се жртва на нечии лични интереси“, напиша Костадинов на ФБ.
Екоактивистите сметаат дека инспекторите треба да имаат одврзани раце, но и мерни инструменти за да мерат и казнуваат на лице место, а не да се потпираат на резултати од акредитирани лаборатории кои ги плаќаат фирмите.
Струмичани тврдат дека институциите само декларативно се залагаат дека работат и се грижат за решавање на проблемот со загадениот воздух.
Струмица во изминативе месеци неколку пати беше со препораки и мерки од државата да се заштитат граѓаните. Освен штетни ПМ честички во струмичкиот воздух има и високи концентрации на сулфур диоксид.
Ване Трајков