Со изведување на нови видео докази продолжи судењето на двојното убиство

Со изведување на видеоматеријали од безбедносни камери, предложени како докази од Обвинителството, денеска во Кривичниот суд продолжи судењето за двојното убиство на Вања Ѓорчевска и Панче Жежовски.

На видеозаписи обезбедени од безбедносните камери на Хотел Парк, се гледа како возилата Цитроен и Рено Кангу влегуваат во Дебар Маало, на улицата Наум Наумовски Борче, од каде е извршено грабнувањето на девојчето на 27 ноември 2023 година.

Првообвинетиот за случајот, Љупчо Палевски Палчо, на почетокот на минатото рочиште, побара изземање на јавната обвинителка Жаклина Крстевска и целото ОЈО Скопје во случајот поради несоодветно спроведена истрага.

Судијата Стефановски на почетокот на денешното рочиште рече дека решението е писмено доставено до Палевски, по што се продолжи со изведување на доказите.

Пред почетокот на денешното рочиште, пак, неколку членови на политичката партија „Десна“, протестираа пред судот.