Трамп воведе санкции на Меѓународниот кривичен суд

Шефот на Белата куќа потпиша извршна наредба за санкции на Меѓународниот кривичен суд, обвинувајќи го за преземање незаконски и неосновани дејствија против САД и Израел. Мерката предвидува финансиски и визни ограничувања за поединците и нивните семејства кои помагаат во истрагите. Од трибуналот велат дека санкциите нема да ги спречат во остварувањето на правдата.

„Судот стои цврсто до својот персонал и се обврзува да продолжи да обезбедува правда и надеж за милиони невини жртви на злосторства низ светот. Ги повикуваме нашите 125 држави членки, граѓанското општество и сите народи во светот да застанат обединети за правда и основни човекови права“, велат од Меѓународен кривичен суд во Хаг.

Одлуките на Трамп секојдневно наидуваат на остри реакции од меѓународната заедница. Светот и натаму го разбранува предлогот на Трамп за преселба на Палестинците и управување на Газа. Врховниот водач ајатолахот Али Хамнеи ги обвини Соединетите Американски Држави за прекројување на картата на светот и предупреди дека ќе одговорат со иста мера доколку им биде загрозена безбедноста од страна на САД.

„Американците седат и ја прецртуваат картата на светот – но само на хартија, бидејќи тоа нема никаква основа во реалноста. Тие даваат изјави за нас, изразуваат мислења и упатуваат закани. Ако ни се закануваат и ако ја нарушат безбедноста на нашата нација, ние, без сомнение, ќе одговориме на ист начин“, изјави Ајатолах Али Хамнеи, врховен водач на Иран.

Државниот секретар Рубио вели дека земјите кои го критикуваат планот на Трамп треба да отстапат и да најдат решение.

„Ми се чини дека има многу земји во светот кои сакаат да изразат загриженост за Газа и за палестинскиот народ, но многу малку беа подготвени да направат нешто конкретно. И затоа мислам дека претседателот Трамп се обидува да го поттикне тоа и се надевам дека ќе добие реакција од некои земји кои имаат и економски и технолошки капацитет да придонесат за постконфликтен регион“, изјави Марко Рубио, државен секретар на САД.

Од ЕУ со став, не треба да има понатамошно принудно раселување на Палестинците, а Газа треба да биде суштински дел од палестинската држава.

„Европската Унија останува целосно посветена на решението за две држави, за кое веруваме дека е единствениот пат кон долгорочен мир и за Израелците и за Палестинците“, рече Ануар Ел Ануни, портпарол на Европската комисија за надворешни работи.

Од Хамас велат дека внимателно ги следат изјавите на американскиот претседател. Во рамки на договорот за прекин на огнот, утре треба да биде ослободена петтата група од тројца израелски заложници киднапирани на 7 октомври 2023 година. Во тек се разговори за втората фаза од спогодбата.

Маријана Димовска