Партиите со полна пареа се подготвуваат за локалните избори
Иако не се откриваат многу детали, политичките партии со полна пареа се подготвуваат за локалните избори. Некои ќе бараат втор мандат, други ја меркаат фотелјата на Арсовска во Град Скопје. Во јавноста веќе се шпекулира со имиња, амбициите не се кријат, а битка ќе се бие и во самите партии …
Според аналитичарите, нема да биде изненадување резултатите од минатогодишните парламентарните избори да се пресликаат и на локалните избори, особено со разликата што ја направија партиите.
Зголемување на предноста е главниот предизвик на ВМРО-ДПМНЕ-оценува аналитичарот Алберт Муслиу. Додава дека и за градоначалниците од владејачката партија потешко е остварување на сите очекувања на граѓаните. За Социјалдемократскиот сојуз, пак, вели дека сè уште закрепнува по претрпениот пораз.
„Имаме СДСМ кој поминува низ катарза, кој на минатите избори оствари максимална загуба и ја имаме ВМРО-ДПМНЕ, која имаше добра победа, но веќе три години се на локална власт. За нив ќе биде предизвик да ги задржат бројките, со можност да ги надградат, што не е лесно, бидејќи ниедна власт не може да ги исполни сите желби. Затоа гледаме зголемена активност на партијата на терен“, вели Муслиу.
За аналитичарот Александар Илиев, клучен фактор е коалициската способност на партиите, како и понудата за мерките во областа на правосудството и економијата, особено во албанскиот кампус каде ВРЕДИ доминира во трите најголеми општини, додека Европскиот фронт пак, мора да работи за зачувување на имиџот на интегративците.
„Влен е дел од власта и тоа има предност како и недостатоци, бидејќи ВМРО-ДПМНЕ е дефинитивно доминантниот фактор во владината коалиција. ДУИ ќе биде ставен во позиција да се оградува од кадрите кои се на американската црна листа“, смета Илиев.
Локалните избори ќе се одржат во октомври.
Марина Стојанова-Тонева