Најавени офанзивни мерки за цените
По вториот бојкот на маркетите, извештајот на Пазарниот инспекторат во вторник на владина седница. Треба да се дефинираат идните чекори. Не се исклучува ограничување на цените. Власта најави офанзивни мерки – под лупа се ставени и аптеки и продавници за бела техника …
Откако втора недела по ред се бојкотираше против високите цени во маркетите, Владата најави офанзивни мерки откако ќе го добие извештајот од Пазарниот инспекторат. Но, ќе се чешлаат и аптеки, како и продавници за бела техника. Премиерот Мицкоски ги отфрла тезите дека високите цени се поради повисоките царински давачки.
Додека премиерот вели дека е нарушена довербата меѓу трговците и владата, сепак, се надева дека дијалогот ќе даде плод. Граѓаните, пак, не веруваат дека бојкотот на подолг рок дава резултат.
Со шестмесечните контроли на Државниот пазарен инспекторат опфатени добавувачите, производителите и трговците. Во вторник на владина седница треба да се искристализираат идните чекори.
Според УЈП, прометот на 8-те синџири маркети „паднал“ за 22% во однос на денот пред бојкотот.
Освен во Македонија, бојкот на маркети се случува и во други земји во соседството.
Борис Грујоски