Аерозагадувањето го загрозува здравјето на граѓаните, државата соочена со тужби

Граѓаните знаат дека можат да ја тужат државата, бидејќи дишат загаден воздух, но од октомври до сега никој не го искористил своето право. Некои се оптимисти дека работите ќе почнат да се средуваат, други се сомневаат во исходот.

Адвокатот Гоџо објаснува – ако се знае точно кој е загадувачот, тогаш патот до правдата е во граѓанските или во кривичните судови, бидејќи имаме работа со ентитет што нанесува штета. Кога не се знае причинителот и не се преземаат доволно мерки, тогаш претставката треба да се адресира на Управниот суд.

Задача на Управниот суд е да утврди кој затаил. Ако се утврди дека тужената институција нема акциски план за справување со аерозагадувањето, судот ја задолжува да изготви план. Врховните судии ги охрабрија граѓаните да почнуваат постапка пред Управниот суд за да го остварат правото на чист воздух.

„Државата, односно надлежните институции согласно овој начелен став се должни да изготват стратешки документи за обезбедување чист амбиентален воздух. Секој граѓанин кој смета дека му е повредено правото на здрава животна средина или има директна или индиректна штета за своето здравје предизвикана од загадување на водата, почвата, воздухот или друго, може да започне судски спор против државата“, стои во соопштението од Врховен суд.

Во Македонија загадениот воздух убива 3.800 граѓани годишно, покажуваат податоците на Светска банка.

Наташа Јанчиќ-Менковски